33 vjet pas njërës prej ngjarjeve më tragjike në historinë italiane, e cila shënoi një pikë kthese në luftën kundër mafies, janë organizuar nisma të shumta për të ripërtërirë kujtesën.
”Sulmi i egër dhe i përgjakshëm që mafia kreu 33 vjet më parë në Capaci, dhe që u përsërit disa javë më vonë në Via D’Amelio në Palermo, përbën një nga plagët më të thella në historinë tonë republikane”, deklaroi presidenti i Republikës, Sergio Mattarella, me rastin e 33-vjetorit të masakrës së Capaci.
“Mendimi i parë, po aq prekës sa ishte sot, shkon për ata që humbën jetën: Giovanni Falcone së bashku me Francesca Morvillo, Antonio Montinaro, Rocco Dicillo, Vito Schifani. Ata janë të lidhur pazgjidhshmërisht me kujtimin e Paolo Borselinos, Emanuela Loi, Agostino Catalano, Walter Eddie Cosina, Vincenzo Li Muli dhe Claudio Traina”, shtoi ai.
”Shërbëtorë të shtetit, të cilët mafia i vrau me dhunë të bujshme për të nënshtruar komunitetin civil. Ato tragjedi gjeneruan një ringjallje të shoqërisë dhe institucioneve. Masakra zbuloi kërcënimin ndaj lirisë së çdo qytetari. Lufta kundër mafies u intensifikua deri në pikën e minimit të pozitave udhëheqëse të organizatës kriminale. Mafia, si çdo fakt njerëzor, kishte një fillim dhe do të ketë gjithashtu një fund. Kjo është ajo që përsëriti Falcone, duke kërkuar qëndrueshmëri dhe angazhim”, theksoi Mattarella.
”Mafia ka pësuar goditje shumë të rënda, por puna e zhdukjes duhet të vazhdojë, duke marrë parasysh transformimet e saj, lidhjet e reja me aktivitetet ekonomike dhe financiare, zonat gri që formohen ku angazhimi qytetar ia lë vendin indiferencës. Në kujtesën e gjallë të Falcones dhe Borsellinos, 23 maji është bërë Dita e Legalitetit, sepse është e nevojshme të ruhet gjithmonë vigjilencë e lartë, duke i përfshirë brezat e rinj në përgjegjësinë e ndërtimit të një të ardhmeje të lirë nga kufizimet kriminale”, përfundon Mattarella.
Ndërkohë, kryeninistrja italiane, Giorgia Meloni tha se ”qeveria ndodhet gjithmonë në vijën e parë kundër krimit”.
“23 Maji është Dita e Legalitetit, në kujtim të viktimave të mafies. Ne kujtojmë Giovanni Falconen, Francesca Morvillon, agjentët e eskortës, të gjithë ata që sakrifikuan jetën e tyre për të mbrojtur vlerat e ligjshmërisë. Dhe bashkë me ta, çdo viktimë që ra në duart e mafies. Shembulli dhe kujtesa e tyre vazhdojnë të udhëheqin veprimin tonë”, deklaroi Meloni.
”Gjithashtu në emër të tyre, qeveria është dhe gjithmonë do të jetë në vijën e parë në luftën kundër të gjitha formave të krimit. Pa pushim dhe pa kompromis”, theksoi ajo në X
