Regjistrimi i popullsisë dhe amvisërive në Mal të Zi ka filluar sot dhe siç ka njoftuar Enti i Statistikave të Malit të Zi (Monstat), regjistruesit do të jenë në terren nga ora 08:00 deri në 20:00. Regjistrimi është planifikuar të zgjasë 15 ditë, deri më 18 dhjetor, por ka mundësi të zgjatet edhe për disa ditë. Regjistrimi gjithashtu do të mbledhë të dhëna për bujqësinë, të cilat përdoren për të identifikuar ekonomitë bujqësore dhe për të paraqitur kornizën për regjistrimin e ardhshëm bujqësor. Nëse një qytetar nuk dëshiron të deklarojë kombësinë e tij, përkatësisht përkatësinë etnike, fenë, gjuhën amtare dhe gjuhën që flet zakonisht si dhe paaftësinë dhe llojin e aftësisë së kufizuar, përgjigjja “Nuk dëshiron të deklarohet” është shkruar në Ligjin e regjistrimit në Mal të Zi. Ligji për regjistrimin e popullsisë, amvisërive dhe banesave parashikon se regjistrimi përfshin shtetasit malazezë që kanë vendbanim në Mal të Zi, pavarësisht nëse janë të pranishëm në vendbanimin ose përkohësisht në një vend tjetër në Mal të Zi ose në një shtet tjetër. Pastaj të huajt që kanë të rregulluar qëndrim të përhershëm ose të përkohshëm në Mal të Zi, familje; banesa dhe ambiente të tjera të banuara. Regjistrimi organizohet pas 12 vitesh. Fillimisht ishte planifikuar të zhvillohej nga 30 nëntori deri më 15 dhjetor, por me vendim të Qeverisë u shty për sot. Ky vendim u mor për shkak se opozita njoftoi se do të bojkotojë regjistrimin, pas së cilës u arrit marrëveshje mes qeverisë dhe opozitës. Enti i Statistikave në Mal të Zi njoftoi se janë plotësuar të gjitha kushtet për realizimin e regjistrimit. Mediat malazeze raportuan deklaratën e kryeministrit të Malit të Zi, Millojko Spajiq, i cili tha se regjistrimi është përgatitur mirë. “Ne kemi treguar se Mali i Zi ka institucione funksionale dhe individë përgjegjës, të gatshëm për të ndërtuar ura për të ardhmen evropiane”, tha Spajiq.
