Lufta e Rusisë ndaj Ukrainës po hyn në një “fazë kritike” falë kundërofensivës së Kievit, deklaroi sot sekretari i përgjithshëm i NATO-s, Jens Stoltenberg. “Forcat ukrainase kanë arritur të frenojnë ofensivën e Moskës në Donbas, tu kundërpërgjigjen trupave ruse dhe të rimarrin territorin”, tha ai gjatë një konference për shtyp me sekretarin amerikan të Shtetit, Antony Blinken. “Vetëm gjatë ditëve te fundit, ne kemi parë një avancim të mëtejshëm si në jug, në Kherson dhe në lindje, në rajonin e Kharkivit”, shtoi ai. Ai tha se kjo tregon trimërinë, aftësinë dhe vendosmërinë e forcave ukrainase. “Dhe kjo tregon se mbështetja jonë po bën ndryshim çdo ditë në fushën e betejës”, tha Stoltenberg. “Solidariteti i Perëndimit nuk duhet të lëkundet tani, pavarësisht krizës energjetike dhe kostos në rritje të jetesës”, shtoi ai. “Por, çmimi që ne paguajmë matet me para, ndërsa çmimi që paguajnë ukrainasit matet me jetë. Dhe të gjithë ne do të paguajmë një çmim shumë më të lartë nëse Rusia dhe regjimet e tjera autoritare kuptojnë se agresioni i tyre shpërblehet”, tha Stoltenberg.http://ata.gov.al/2022/09/09/bruksel-stoltenberg-lufta-ne-ukraine-ne-faze-kritike/
- Advertisment -