Londra i dorëzon Kievit raketa me rreze të gjatë veprimi

Britania e Madhe i ka dorëzuar Ukrainës raketa me rreze të gjatë veprimi, tip ”Storm Shadow”, në funksion të kundërofensivës së planifikuar, sipas CNN duke cituar zyrtarë të lartë perëndimorë. Në veçanti, ”Storm Shadow” kanë aftësinë të godasin thellë në territorin e kontrolluar nga Rusia në Ukrainën Lindore. Një zyrtar perëndimor i tha transmetuesit amerikan se Britania e Madhe kishte marrë garanci nga qeveria ukrainase se këto raketa do të përdoreshin vetëm brenda territorit sovran të Ukrainës dhe jo në Rusi. ”Storm Shadow” është një raketë me rreze të gjatë veprimi, e zhvilluar bashkërisht nga Mbretëria e Bashkuar dhe Franca dhe zakonisht lëshohet nga ajri. Me një rreze prej mbi 250 kilometrash, është paksa e vogël krahasuar me kapacitetin e sistemeve të raketave, tip ”Atacms”, të prodhuara në SHBA, të cilat Ukraina i kërkon prej kohësh. atsh