Liqeni i Dashit, Monument Natyre, i ndodhur në Parkun Kombëtar të Alpeve të Shqipërisë është kthyer në një destinacion turistik për turistët e pasionuar pas alpinizimit. Ministrja e Turizmit dhe Mjedisit, Mirela Kumbaro ndau sot momente nga ngjitja e turistëve në Liqenin e Dashit, gjatë fundjavës që lamë pas. “Liqeni i Dashit ndodhet në 2180 metër lartësi brenda Parkut Kombëtar të sapokrijuar “Alpet e Shqipërisë” . Vazhdimisht e sidomos në këto ditë të nxehta është destinacion për vizitorët shqiptarë e të huaj të turizmit malor”, thekson Kumbaro. Ky liqen është një nga liqenet më të mëdhenj akullnajorë që gjendet në vargmalin malor që ruan në të katër stinët e vitit të njëjtin nivel ujor. I ndodhur mes kullotave alpine të Parkut Kombëtar të Alpeve të Shqipërisë me një peizazh piktoresk është kthyer në një destinacion shumë të vizitueshëm turistik nga vizitorët vendas dhe të huaj.
https://ata.gov.al/2022/07/18/kumbaro-liqeni-i-dashit-destinacion-i-turizmit-malor/
