Ministri i Jashtëm ukrainas, Dmytro Kuleba ka vlerësuar një ndërhyrje të pazakontë të kancelarit gjerman Olaf Scholz në samitin e BE-së këtë javë, në një lëvizje që mundësoi fillimin e bisedimeve të pranimit për Kievin. “Ajo që kancelari Olaf Scholz bëri në samit për të hequr kërcënimin e një vetoje hungareze do të mbetet në histori si një akt i udhëheqjes gjermane në interes të Evropës”, tha Kuleba për gazetën ”Bild am Sonntag”. “Unë vetëm mund të shpresoj se kjo nënkupton gjithashtu një kthesë më të gjerë dhe të pakthyeshme në qëndrimin e Gjermanisë ndaj përpjekjeve udhëheqëse për zgjidhjen e çështjeve më të ndërlikuara”, theksoi ai. Mosmarrëveshja për fillimin e negociatave të anëtarësimit në BE me Ukrainën ishte bllokuar deri në samit, sepse Hungaria po bllokonte bisedimet. Scholz sugjeroi që kryeministri Viktor Orbán të largohej përkohësisht nga takimi në mënyrë që të lejojë krerët e tjerë të shteteve dhe qeverive të arrijnë konsensusin e nevojshëm. Kjo do të thoshte se udhëheqësi hungarez mund t’i përmbahej qëndrimit të tij për negociatat – të cilat ai i përshkroi si “krejtësisht të pakuptimta” – pa i bllokuar ato. Nga ana e tij, Scholz tha pas samitit se mashtrimi diplomatik u krye “me marrëveshje reciproke në përputhje me rregullat tona”. ”Kjo nuk është diçka që duhet bërë gjithmonë”, shtoi ai
