Kreditë me probleme pësuan rënie në nëntor të vitit të kaluar. Sipas statistikave të publikuara sot nga Banka e Shqipërisë, ky tregues zbriti në 5.07%, nga 5.12% që kishte qenë në muajin tetor 2023. Sipas bankierëve, rënia e kredive me probleme gjatë vitit të kaluar mund të shpjegohet me disa faktorë. “Forcimi i ndjeshëm i lekut në kursin e këmbimit me euron dhe shumicën e valutave të huaja ka ndihmuar në ruajtjen e aftësisë paguese të subjekteve huamarrëse me të ardhura në monedhën vendase. Kjo ka kompensuar edhe rritjen e normave të interesit për kreditë në valutë të huaj, që ka pasuar shtrëngimin e politikës monetare nga Banka Qendrore Europiane dhe rritjen e ndjeshme të treguesit benchmark Euribor. Ndërkohë, në monedhën vendase rritja e normave të interesit ka qenë mjaft e kufizuar gjatë vitit të kaluar. Madje, rënia e yield-ve të titujve qeveritarë ka bërë që normat mesatare të interesit të kredive të lëvizin në rënie”, shprehen ata. Banka e Shqipërisë vlerëson se rritja vjetore e kredisë në lekë arriti në 9%.
