Nisma Korsitë Blu (Blue Lanes) do të përmirësojë trafikun detar midis Shqipërisë, Malit të Zi dhe Italisë, falë sistemit SEED+, Sistemi për Shkëmbimin Elektronik të të Dhënave, i cili është funksional në CEFTA. Genti Gazheli, drejtor i përgjithshëm i Administratës Doganore të Shqipërisë, Rade Millosheviq, drejtor i Administratës së të Ardhurave dhe Doganave të Malit të Zi dhe Marcello Minenna, drejtor i Agjencisë së Doganave, Akcizave dhe Monopoleve të Italisë, nënshkruan sot në Romë, Memorandumin e Mirëkuptimit për shkëmbimin elektronik të të dhënave ndërmjet këtyre institucioneve. Në një njoftim për shtyp Dogana Shqiptare bën të ditur se, kjo mundësi u shfrytëzua për të diskutuar mbi zhvillimin e ardhshëm të nismës Korsitë Blu (Blue Lanes) dhe marrëdhëniet tregtare në zonën e detit Adriatik. “Ky është një moment historik i rëndësishëm për palët e CEFTA-s duke qenë se ky bashkëpunim do t’i shërbejë jo vetëm Shqipërisë dhe Malit të Zi, por edhe Palëve të tjera të CEFTA-s që do të përdorin portet në Shqipëri dhe Mal të Zi për tregti. Krijimi i infrastrukturës së TI-së është në vazhdim dhe pritet që sistemi të funksionojë në vjeshtën e vitit 2022. Ky bashkëpunim hap mundësitë për zgjerimin e mëtejshëm të nismave të Korsive të Gjelbra dhe Blu drejt vendeve të tjera anëtare të BE-së”, thuhet në njoftim. Të dhënat do të shkëmbehen elektronikisht përmes platformës SEED, financuar nga BE. Sistemi SEED për shkëmbimin elektronik të të dhënave ka një rol vendimtar në zbatimin e Korsive të Gjelbra CEFTA-TCT në CEFTA, por edhe ndërmjet CEFTA-s dhe Greqisë, që ka funksionuar që nga korriku i këtij viti. SEED është implementuar që nga viti 2010, më vonë është përmirësuar në SEED+ dhe ka përmirësuar menaxhimin e pikave të kalimit në Ballkanin Perëndimor, ka përmirësuar efikasitetin dhe komunikimet ndërkufitare, si dhe procedurat e thjeshtuara dhe të modernizuara. “Sistemi SEED është thelbi i iniciativave të Gjelbra/Blu, duke ofruar infrastrukturën e sigurt të TI-së për përshpejtimin e procedurave doganore, formaliteteve dhe kontrolleve doganore, jo vetëm ndërmjet Palëve të CEFTA-s, por edhe me BE-në. Duke qenë shumë fleksibël dhe i adaptueshëm, sistemi SEED po i afron administratat dhe bizneset tona më pranë BE-së dhe tregut të saj të përbashkët”, deklaroi Emir Djikic, drejtor i Sekretariatit të CEFTA-s. Memorandumet e nënshkruara midis Shqipërisë, Malit të Zi dhe Italisë mbajnë në konsideratë plotësisht rëndësinë e detyrimeve doganore dhe taksave të tjera të aplikueshme gjatë tregtisë së mallrave, njeh nevojën për bashkëpunim ndërkufitar dhe merr parasysh objektivat e Planit të Veprimit të Përbashkët Rajonal të Tregut. Krijimi i Korsive të Gjelbra CEFTA-TCT brenda Ballkanit Perëndimor gjatë COVID-19 rezultoi të ishte një nga shembujt më të suksesshëm të bashkëpunimit rajonal.http://ata.gov.al/2022/09/09/korsite-blu-lehtesim-i-trafikut-detar-midis-shqiperise-malit-te-zi-dhe-italise/
- Advertisment -