Kori nga Kosova fiton 2 medalje të arta në World Choir Games

Kori Siparantum, kori më i njohur në skenën e muzikës korale në Kosovë, përfaqësoi Kosovën në ngjarjen më të madhe të koreve në botë, World Choir Games 2023. Kori Siparantum fitoi dy medale të arta në Republikën e Koresë së Jugut, ku u zhvillua aktiviteti. Artistët kosovarë fituan në kategoritë “Mixed Choir” dhe “Musica Contemporanea”, ku shfaqën performancë të jashtëzakonshme dhe u vlerësuan me medalje e arta. “Siparantum ka triumfuar në dy kategori “Mixed Choir” dhe “Musica Contemporanea”. Kjo falë punës së palodhme të korit për të promovuar kulturën dhe vendin tonë anë e kënd botës. Faleminderit Memli dhe ekipi fantastik”, ka shkruar ministri i Kulturës, Hajrulla Çeku, në rrjetet sociale. Vetë drejtuesit e korit u shprehën se, ky sukses tregon potencialin e madh dhe përkushtimin e anëtarëve të korit. “Jemi tejet të lumtur për këtë sukses, dhe krenarë që përfaqësuam Kosovën në këtë garë prestigjioze. Faleminderit për gjithë ju që mbështetni rrugën tonë drejt suksesit”, e përfundon mesazhin vetë kori “Siparantum”. atsh