​Konjufca: Arritjet e Kosovës janë edhe suksese të aleatëve

Kryetari i Kuvendit, Glauk Konjufca, në kuadër të vizitës së tij zyrtare në Francë, ka takuar kryetaren e Asamblesë Kombëtare të Francës, Yaël Braun-Pivet. Ata kanë diskutuar për situatën aktuale derisa Konjufca ka thënë se ka theksuar përkushtimin e Kosovës ndaj angazhimeve që në vëmendje kanë frymën e Bashkimit Evropian. Konjufca ka shkruar se arritjet e shtetit të Kosovës janë edhe suksese të aleatëve të cilët e kanë ofruar mbështetje. “Diskutuam për situatën aktuale në vendet tona dhe për sfidat nëpër të cilat gjendemi aktualisht. I theksova zj. Yawl Braun-Pivet përkushtimin e plotë të Republikës së Kosovës ndaj angazhimeve tona që në vëmendje kanë shembullin, mjetet dhe frymën e Bashkimit Evropian, unionit të vlerave dhe qëllimeve tona të përbashkëta”, ka shkruar Konjufca. Konjufca ka takuar edhe nënkryetaren e Asamblesë Kombëtare, Valérie Rabault, kryetarin e Komisionit për Punë të Jashtme, Jean-Louis Bourlanges, deputetin për francezët që jetojnë jashtë Francës, Frédéric Petit dhe kryetarin e Grupit të Miqësisë Francë-Kosovë, Jean-Philippe Ardouin. Konjufca ka thënë se e ka theksuar nevojën për thellim të bashkëpunimit mes dy vendeve aleate. “Republika e Kosovës është shumë e interesuar që partneriteti mes dy vendeve tona të jetë jo vetëm i vazhdueshëm dhe i palëkundur, por edhe të thellohet më tej duke lëvruar gjithë potencialin e vet, nga pikëpamja institucionale, kulturore, ekonomike dhe politike, si përgjigje e domosdoshme ndaj rrethanave ku gjendemi aktualisht si bllok perëndimor, me vlera dhe synime të përbashkëta që i mbrojmë dhe i zhvillojmë”, ka shkruar ai. atsh