Filmi dokumentar “Dritë”, kushtuar mjeshtrit botëror të fotografisë me origjinë shqiptare Gjon Mili, i realizuar nga regjisoret Yllka Gjollesha dhe Suela Bako, vjen për publikun në bashkëpunim me Qendrën “Cinespia 67”, pjesë e aktivitetit “Kinemaja në Rajone” Korçë. Delikatesa e punës së Gjon Milit, si një fije e hollë drite, përshkruhet në detaje të çdo fotografie. Mili nuk erdhi asnjëherë në Shqipëri që kur u largua si fëmijë, sepse qeveria e kohës ia refuzoi kërkesat e tij për vizë, por gjithsesi ai ka nderuar emrin e Shqipërisë kudo në botë, duke lënë gjurmë në art e histori.
Qendra për Hapje e Dialog shkruan online se, çdo fotografi e mjeshtrit Gjon Mili edhe sot e kësaj dite është një dokumentar më vete dhe nuk mjafton asnjë minutazh i përcaktuar për të eksploruar botën e tij nëpërmjet fotografisë që ai na ka lënë. Filmi do të shfaqet në Bibliotekën e Qytetit të Korçës ditën e shtunë dhe hyrja do të jetë e lirë.
