Udhëheqësi i Koresë së Veriut Kim Jong Un do të klasifikojë Korenë e Jugut si shtetin armik numër një në kushtetutën e vendit të tij. Në një fjalim në parlament në Phenian, Kim theksoi se ribashkimi me fqinjin e tyre jugor nuk është më i mundur. “Shprehjet si, pavarësia, ribashkimi paqësor dhe bashkimi i madh kombëtar duhet të fshihen nga kushtetuta”, tha Kim. Situata në gadishullin Korean është më e tensionuar se sa ka qenë për vite me radhë në sfondin e konfliktit për programin e armëve bërthamore të Koresë së Veriut. Vendi i Kim është subjekt i sanksioneve të ashpra ndërkombëtare. Kohët e fundit, Kim e etiketoi Korenë e Jugut si armikun kryesor gjatë vizitave në fabrikat e municioneve dhe njoftoi një riorientim të politikës së mëparshme të bashkimit. Në seancën parlamentare, Kim akuzoi edhe një herë Korenë e Jugut se po kërkon të sjellë fundin e qeverisë së tij. “Ne nuk duam luftë, por gjithashtu nuk kemi ndërmend ta shmangim atë”, citohet të ketë thënë ai nga KCNA Watch, një organizatë që monitoron mediat koreano-veriore. Kim deklaroi se një amendament kushtetues duhet ta bëjë të qartë se të gjithë koreano-veriorët duhet të kenë të qartë idenë e fortë se, ROK (Republika eoresë se Jugut) është armiku i tyre kryesor dhe armiku kryesor i pandryshueshëm. Asambleja e Lartë Popullore e Koresë së Veriut konsiderohet një parlament i rremë jashtë vendit. Zakonisht, ajo mblidhet vetëm disa herë në vit për të miratuar vendimet e marra nga udhëheqja e shtetit dhe Partia e Punëtorëve.
