Një nëpunës i lartë civil që punon në Ministrinë e Mbrojtjes të Ukrainës është arrestuar me akuzën e mashtrimit në shumën e gati 40 milionë dollarëve në lidhje me blerjen e municioneve artilerie, kanë njoftuar prokurorët e Kievit. Fotot e provave dhe të personit u publikuan të premten. Në shtator, Oleksii Reznikov u shkarkua nga posti i ministrit të Mbrojtjes pas zbulimit të korrupsionit. Reznikov nuk është akuzuar personalisht. Zyrtari në rastin aktual thuhet se ka lidhur kontratë të pafavorshme për blerjen e municionit. ”Kostot e blerjes nga eksportuesi i përdorur ishin rreth 30% më të larta se një blerje direkte nga prodhuesi. Kohët e dorëzimit ishin gjithashtu më të gjata”, thanë prokurorët. ”Një kontroll në zyrat dhe shtëpinë e zyrtarit dha prova inkriminuese”, thanë ata. Hetimet po vazhdojnë. Nëse shpallet fajtor, zyrtari përballet me 15 vjet burg. Ministria e Mbrojtjes tha se po ndërmerren hapa për të rikuperuar fondet e përvetësuara. Udhëheqësit ukrainas kanë theksuar shpesh nevojën për më shumë predha për artilerinë e tyre. Ukraina është nën presionin e aleatëve të saj perëndimorë për të frenuar korrupsionin, i cili raportohet të jetë i shfrenuar. Bashkimi Evropian e ka bërë të qartë se lufta kundër korrupsionit është çelësi për përparimin në bisedimet e pranimit dhe presidenti Volodymyr Zelensky ka nisur vazhdimisht aksione kundër korrupsionit. Në fillim të nëntorit, revista amerikane Time citoi një këshilltar të lartë presidencial duke thënë se “njerëzit po vjedhin sikur e nesërmja nuk do të vijë kurrë”.
