Këshilli i Sigurimit i OKB-së ka votuar në favor të përfundimit të misionit të tij politik në vendin e shkatërruar nga lufta civile, Sudan. “Katërmbëdhjetë nga 15 shtetet anëtare votuan pro, me Rusinë që abstenoi”, njoftuan Kombet e Bashkuara në Nju Jork. Misioni i Kombeve të Bashkuara për Ndihmën e Tranzicionit të Integruar në Sudan (UNITAMS) u krijua nga Këshilli i Sigurimit në qershor 2020 për të mbështetur Sudanin në tranzicionin e tij politik drejt një qeverie demokratike. Një konflikt i armatosur shpërtheu në vendin e Afrikës verilindore në mes të prillit të këtij viti. Në qershor, Sudani shpalli ‘persona non grata’ të dërguarin e posaçëm gjerman të OKB-së, Volker Perthes. Ai u akuzua për nxitje të konfliktit. Perthes dha dorëheqjen në shtator. OKB-ja gjithmonë i ka hedhur poshtë akuzat. Megjithatë, dy javë më parë, Sudani i bëri thirrje OKB-së që t’i japë fund misionit të UNITAMS. Ushtria e vendit po lufton nën udhëheqjen e komandantit dhe presidentit ‘de facto’ të Sudanit, Abdel Fattah al-Burhan, kundër Forcave paraushtarake të Mbështetjes së Shpejtë (RSF) të zëvendëspresidentit Mohammed Hamdan Daglo, i cili u shkarkua gjatë konfliktit.
