Një pavijon i parë kombëtar pas vitesh dhe një palë filma me kritika pozitive normalisht do të ishin shkak për festime në Kanë, shkruan France24.com.
Por, në tendën që strehon pavijonin e Palestinës, vetëm pak minuta larg Pallatit të Festivaleve në Kanë, askush nuk ka ardhur në Rivierën Franceze të shkëlqyer për t’u mbledhur për festën.
“Ne padyshim nuk jemi këtu për festën e Kanës”, thotë producenti i filmit Rashid Abdelhamid, zëri i të cilit mbytet nga zhurma e një kokteji në Pavijonin Amerikan ngjitur.
“Por, ne po bëjmë festimet tona – të jetës dhe rezistencës”, shton producenti i hitit të festivalit “One Upon a Time in Gaza”, i cili u shfaq premierë dhe korri duartrokitje të zjarrta.
“Ne duam të tregojmë se jemi këtu, se jemi gjallë, se duam të jetojmë dhe të kërcejmë si të gjithë të tjerët”, shton ai.
Asgjë nuk ka mbetur nga Gaza
Vëllezërit binjakë të lindur në Gaza, Arab dhe Tarzan Nasser, dolën me idenë për filmin shumë kohë para fillimit të luftës së vazhdueshme që ka zhdukur pjesën më të madhe të atdheut të tyre – dhe e bënë titullin e filmit të tyre çuditërisht aktual.
Filmi zhvillohet në vitin 2007, vitin kur Hamasi mori kontrollin e Rripit të Gazës dhe Izraeli filloi bllokadën e tij shkatërruese të territorit.
Vëllezërit Nasser e përshkruajnë atë si një “pikë kthese brutale” duke vënë në lëvizje një zinxhir ngjarjesh që përfundimisht do të çojnë në “shkatërrimin” e Gazës dhe popullit të saj.
Lufta që ende po zhvillohet në Gaza ka vrarë më shumë se 53 000 persona, shumica prej tyre gra dhe fëmijë, sipas zyrtarëve të shëndetësisë.
Izraeli është zotuar të “marrë kontrollin e plotë” të territorit të rrethuar me më shumë se dy milionë banorë, ku agjencitë e OKB-së kanë paralajmëruar për uri pasi një bllokadë e gjatë u shtrëngua më tej në mars.
Vëllezërit Nasser, të cilët u larguan nga Gaza në vitin 2011 dhe xhiruan filmat e tyre në Jordani, e përshkruajnë filmin e tyre të fundit si “material arkivor” që dokumenton një vend që nuk ekziston më.
“Çdo gjë që thuhet për Gazën tani duhet të jetë në kohën e shkuar, sepse nuk ka mbetur asgjë nga Gaza që njihnim”, thotë Arab Nasser.
“Izraeli e ka shkatërruar atë nga veriu në jug. Rrugët, pemët, njerëzit – të gjitha janë zhdukur”, thekson ai.
Rambo nga Gaza
Filmi ”ndjek” trafikantin e drogës të nivelit të ulët Yahia (Majd Eid) dhe shërbëtorin e tij Osama (Nadel Abd Alhay) ndërsa përpiqen të fitojnë pak para shtesë duke shitur drogë të futur në sanduiçe.
Osama modest ëndërron për një jetë më të mirë jashtë territorit të bllokuar, por përfundon i punësuar nga udhëheqësit e saj të rinj islamistë për të luajtur rolin e një Rambo palestinez të papritur në një serial televiziv propagandistik.
Ashtu si në filmat e tyre të mëparshëm, përfshirë “Gaza Mon Amour” (2020), vëllezërit Nasser zhyten në dramë dhe humor të zymtë për të hedhur dritë mbi gjendjen e vështirë të popullsisë së goditur të atdheut të tyre.
”Nuk ka efekte speciale në Gaza”, thekson producenti “por kemi plumba të vërtetë”.
Festivali i këtij viti është hapur në një sfond zemërimi në rritje ndaj luftës së vazhdueshme, e cila filloi pas masakrës së udhëhequr nga Hamasi më 7 tetor 2023 në Izraelin jugor, në të cilën u vranë rreth 1 200 persona, shumica prej tyre civilë, dhe më shumë se 250 njerëz u morën peng.
Në prag të festivalit, aktori i “Shindler’s List”, Ralph Fiennes, dhe ylli i Hollivudit Richard Gere ishin midis më shumë se 380 figurave që nënshkruan një letër të hapur duke kritikuar heshtjen e industrisë së filmit mbi “gjenocidin” në Gaza.
Letra, e botuar nga ”Libération” dhe ”Variety”, dënoi vrasjen e fotoreporteres Fatma Hassona, përpjekjet e së cilës për të dokumentuar shkatërrimin e Gazës janë subjekt i një dokumentari të shfaqur në Kanë.
Presidentja e jurisë së festivalit, Juliette Binoche, gjithashtu i bëri homazh Hassonas gjatë ceremonisë së hapjes, duke lexuar fragmente nga një poezi e 25-vjeçares nga Gaza, e cila u vra nga një sulm raketor izraelit në shtëpinë e saj
