Pastrimi i territorit vijon të mbetet prioritet i bashkisë së Lezhës, e cila vazhdon çdo ditë aksionet e pastrimit. Kryetari i bashkisë Lezhë, Pjerin Ndreu solli sot në vëmendje momente nga aksioni i pastrimit territorit i cili ka nisur në mënyrë intensive në 19 gusht 2019. “Ishte 19 gusht kur startuam të punojmë duke pastruar territorin e lënë në gjendje skandaloze. Shumë u tallën duke me etiketuar si brigadier pastrimi, sot e kam për nder se ja dolëm. Përtej çdo përqeshje dhe mosbesimi, pikërisht me të njëjtët punëtorë të palodhur, punojmë prej tre vitesh me përkushtim”, u shpreh Ndreu. “Po çfarë ka Lezha me prioritare se turizmin? Me sot jemi hapa galopant para duke tjetërsuar një histori tmerri papastërtie e kaosi në plazhe. Nuk do të ndalemi asnjëherë për të bërë punën në shërbim të qytetarëve për ta kthyer Lezhën në lavdinë që i takon”, tha ai. Bashkia e Lezhës ka treguar gjithmonë kujdes dhe vëmendje për gjithë bregdetin e Lezhës dhe zonat e tjera turistike për të krijuar gjithë kushtet e nevojshme që pushuesit të kalojnë një sezon turistik të qetë e sa më komod. Pastrimi i mjediseve publike në bregdet, qytete dhe njësitë administrative, ka qenë në fokus të punës së bashkisë. Ndërthurja e turizmit bregdetar me atë historik e natyror dhe kulinaria e pasur e bëjnë Lezhën një destinacion për turizëm gjithëvjetor. I ndodhur në kryqëzim të rrugëve tregtare, historike e kulturore, pjesë e rëndësishme e kujtesës historike kombëtare, Lezha ka krijuar një përvojë të konsoliduar në fushën e turizmit. Vetëm 53 km larg kryeqytetit, qyteti i Lezhës ofron vlera të mëdha turistike, me objekte historike muzeale, arkeologjike si dhe objekte kulti, si Kisha Françeskane e ndërtuar në vitin 1240.http://ata.gov.al/2022/08/19/ndreu-jo-me-kaos-e-papasterti-ne-plazhe/
- Advertisment -