Ushtria izraelite do të rrisë më tej presionin ushtarak ndaj Hamasit islamik, ndërsa lufta po i afrohet ditës së saj të njëqindtë, deklaroi shefi i Shtabit të Përgjithshëm të ushtrisë izraelite, Herzi Halevi. “Ne miratuam planet që Komanda Jugore të vazhdojë luftimet dhe të rrisë presionin ushtarak ndaj Hamasit. Presioni që do të çojë në shpërbërjen e Hamasit dhe kthimin e pengjeve”, tha Halevi. ”Ky presion dhe vetëm ai ka arritur të kthejë shumë pengje”, shtoi ai. Lufta filloi pas sulmit shkatërrues terrorist ndaj Izraelit nga Hamasi dhe grupet e tjera ekstremiste më 7 tetor, i cili la rreth 1 200 njerëz të vdekur dhe rreth 250 të tjerë të marrë peng. Izraeli u përgjigj me sulme masive ajrore dhe një ofensivë tokësore. Gjatë një armëpushimi në nëntor, 105 pengje u liruan në këmbim të 240 të burgosurve palestinezë. ”Kjo erdhi vetëm përmes presionit ushtarak që shumë nga ato pengje u liruan”, tha Halevi. Sipas autoritetit shëndetësor të kontrolluar nga Hamasi, më shumë se 23 000 njerëz në Rripin e Gazës janë vrarë deri më tani nga ushtria izraelite. ”Udhëheqja e Hamasit po i mbështet shpresat e saj në një armëpushim dhe është e bindur se ky moment është afër”, tha Halevi. Halevi iu drejtua edhe luftimeve me Hezbollahun në Liban. Grupi është aleat me Hamasin. Ai deklaroi se “zona e Libanit Jugor është një zonë luftimi dhe do të mbetet e tillë për sa kohë që Hezbollahu të veprojë prej saj. Hezbollahu rrezikon ta kthejë të gjithë shtetin e Libanit në një zonë lufte”.
