Parlamenti i Izraelit (Knesset) ka miratuar legjislacionin që lejon mbylljen e televizionit Al Jazeera. Ligji u miratua me 71 vota pro kundrejt 10 votave në leximin e dytë dhe të tretë në nj[ seancë plenare të Knesset-it. Leximi i parë i projektligjit u miratua më 12 shkurt. Sipas projektligjit, ministri i Komunikimeve do të autorizohet të mbyllë rrjetet e huaja që operojnë në Izrael dhe të konfiskojë pajisjet e tyre nëse ministri i Mbrojtjes identifikon se transmetimi i tyre përbën një dëm të vërtetë për sigurinë e shtetit.
Pas miratimit të ligjit, ministri izraelit i Komunikimeve, Shlomo Karhi, u zotua se kanali Al Jazeera i financuar nga Katari do të mbyllet “në ditët në vijim”. Sot herët, kryeministri izraelit, Benjamin Netanyahu, u zotua të “veprojë menjëherë për të mbyllur televizionin Al Jazeera” pas miratimit të projektligjit në Knesset. SHBA e përshkroi miratimin e projektligjit për mbylljen e televizionit Al Jazeera-s si “shqetësues”. “Ne besojmë në lirinë e shtypit. Është kritike. Është jashtëzakonisht e rëndësishme.
Dhe SHBA-ja mbështet punën kritike të rëndësishme që bëjnë gazetarët në mbarë botën dhe që përfshin ata që raportojnë në konfliktin në Gaza”, tha Karine Jean-Pierre, zëdhënësja e Shtëpisë së Bardhë, gjatë një konference për media. Al Jazeera ka një zyrë në Izrael dhe një ekip korrespondentësh që punojnë gjatë gjithë vitit, duke përfshirë mbulimin e luftës së vazhdueshme të Izraelit në Rripin e Gazës, e cila ka vrarë të paktën 32.850 njerëz që nga 7 tetori i vitit 2023
