Ushtria izraelite tha sot se avionët e saj vazhduan të godasin Rripin e Gazës dhe se trupat kanë mbyllur plotësisht kufirin, si një shenjë se një ofensivë tokësore në territorin palestinez mund të jetë e pashmangshme.
Në ditën e katërt të luftimeve pas një sulmi të paprecedentë dhe brutal ndaj komuniteteve izraelite nga qindra luftëtarë të Hamasit nga Rripi i Gazës, ushtria izraelite, IDF, tha se kishte rimarrë kontrollin e plotë të kufirit në Rripin e Gazës dhe se asnjë militant nuk kishte hyrë aty që nga mbrëmja e së hënës.
Sulmi i shumëfishtë në fundjavë shkaktoi vdekjen e rreth 900 personave në Izrael dhe më shumë se 2 600 të plagosur.
“Kalimi i Rafahut në kufirin jugor të Rripit të Gazës me Egjiptin është mbyllur deri në një njoftim të dytë”, tha një burim i sigurisë egjiptiane.
“Ka pasur një gjendje gatishmërie përgjatë kufirit me Egjiptin për të ndaluar çdo përpjekje për infiltrim”, tha burimi.
Të hënën, Izraeli tha se po vendoste një “rrethim të plotë” në territor pa lejuar energjinë elektrike, ushqimin, karburantin apo ujin.
Izraeli ndërkohë ka evakuar pothuajse plotësisht komunitetet e vendosura pranë kufirit të Rripit të Gazës, që shihet si një përgatitje tjetër për një ofensivë tokësore.
Zëdhënësi i IDF-së, Daniel Hagari tha të martën se çdo palestinez që i afrohej barrierës me Izraelin do të qëllohej.
Izraeli ka vazhduar të godasë qindra objektiva në Rripin e Gazës e sunduar nga Hamasi nga ajri dhe ka thirrur rreth 300 000 rezervistë përpara një pushtimi të mundshëm tokësor
