Forcat e Mbrojtjes të Izraelit (IDF) deklaruan se goditën objektivat e Hamasit në Libanin jugor pasi u vunë nën sulme të rënda me raketa nga fqinji i saj verior. “IDF ka goditur objektiva duke përfshirë infrastrukturën terroriste që i përkasin Hamasit në Libanin jugor”, tha ushtria izraelite në një postim në Twitter. “IDF nuk do të lejojë organizatën terroriste Hamas të veprojë nga brenda Libanit dhe do të mbajë shtetin e Libanit përgjegjës për çdo zjarr të drejtpërdrejtë që vjen nga territori i tij”, shkruhet në postim. Sipas raportimeve të mediave, ka pasur shpërthime pranë qytetit të Tirit në jug të Libanit. Thuhet se afër ka një kamp refugjatësh palestinezë. IDF tha se rreth 34 raketa u hodhën në Izrael të enjten, duke shënuar një nga sulmet më të mëdha që nga viti 2006. Kryeministri izraelit Benjamin Netanyahu premtoi një përgjigje të ashpër në mbrëmje. “Ne do të godasim armiqtë tanë dhe ata do të paguajnë çmimin për çdo akt agresioni,” tha ai në fillim të një takimi të kabinetit të sigurisë në Jerusalem. atsh
- Advertisment -