IPARD II, 46 kontrata për investime në pajisje dhe linja përpunimi në ferma

Agjencia për Zhvillimin Bujqësor dhe Rural (AZHBR) në kuadër të programit IPARD II ka nënshkruar 46 kontrata për investime në pajisje dhe linja përpunimi në ferma. Ministria e Bujqësisë dhe Zhvillimit Rural bëri të ditur se investimet janë realizuar në linjat e përpunimit të qumështit, të fruta–perimeve, vreshtave, vajit të ullirit dhe bimëve medicinale. Vendosja e pajisjeve dhe linjave të përpunimit ka lehtësuar proceset e punës dhe ka përmirësuar standardet e prodhimit, duke rritur sigurinë ushqimore dhe reduktuar humbjet gjatë prodhimit. Përmes këtyre investimeve synohet zhvillimi i sektorëve të ndryshëm të ekonomisë dhe rritja e të ardhurave në zonat rurale. Granti i dhënë për sektorin e agropërpunimit ka arritur vlerën 19,2 milion euro, të cilat janë fonde të Bashkimit Evropian në bashkëfinancim me qeverinë shqiptare. Pas vlerësimit pozitiv nga komuniteti europian, AZHBR është në pritje të fondeve të reja përmes programit IPARD III, me 146 milionë euro të gatshme për t’u injektuar në ekonominë e vendit. atsh