Shqipëria po vizitohet gjithnjë e më shumë nga turistë të huaj. Instituti i Statistikave (INSTAT) publikoi së fundmi ecurinë e strukturave akomoduese ku për tetorin 2023 vihet re një rritje dyshifrore si për qëndrimet e rezidentëve edhe për jorezidentët. Sipas INSTAT-it, numri i vizitorëve gjithsej është rritur me 41.4%, në krahasim me tetorin e 2022. Numri i vizitorëve rezident, sipas INSTAT, është rritur me 44%, ndërsa numri i vizitorëve jo-rezident është rritur me 39.3%. Referuar INSTAT, numri i netë qëndrimeve gjithsej është rritur me 68.8%, në krahasim me tetorin 2022. Konkretisht numri i netë qëndrimeve nga rezident është rritur me 78.9% kurse numri i netë qëndrimeve nga jorezident është rritur me 62.1%. Norma neto e shfrytëzimit të dhomave dhe të shtretërve, tregues i cili mat përqindjen e shfrytëzimit të kapaciteteve akomoduese, dhoma e shtretër të disponueshëm për vizitorë është rritur gjithashtu. Gjatë muajit tetor, norma e shfrytëzimit të dhomave të “hoteleve dhe akomodimeve të ngjashme” është 16.4%, kundrejt 12.5% që ishte në muajin tetor 2022. Norma e shfrytëzimit të shtretërve të “hoteleve dhe akomodimeve të ngjashme” është 18.4%, kundrejt 12.4% që ishte në muajin tetor 2022.
