Në prill, numri i aksidenteve shënoi rritje me mbi 78 %, duke arritur në 123, në raport me prillin e vitit 2023. Instituti i Statistikave publikoi sot raportin mbi aksidentet automobilistike sipas të cilit në total gjatë periudhës janar-prill, numri i aksidenteve ishte 500, nga 332 që ishte në të njëjtën periudhë të një viti më parë. Shkak kryesor për aksidentet sipas të dhënave vlerësohet se është sjellja e shoferëve në timon, ndërkohë që grupmosha më problematike vlerësohet se është ajo mes 25-34 vjeç. “Aksidentet rrugore, në 84.6 % të rasteve kanë ndodhur si pasojë e sjelljes së drejtuesit të mjetit. Numri më i lartë i aksidenteve, në këtë periudhë, është kryer nga grupmosha 25-34 vjeç, duke zënë 29.3 % të numrit të aksidenteve gjithsej”, thuhet në raport. Në muajin prill 2024, numri më i lartë i aksidenteve rrugore ka ndodhur ditën e hënë me 23.5 %, ndërsa numri më i ulët i aksidenteve ka ndodhur në ditën e shtunë, me 9.8 %. Numri më i lartë i aksidenteve rrugore ka ndodhur gjatë harkut kohor 08:00-12:00, duke zënë 21.1 % të numrit të aksidenteve rrugore gjithsej.
