India dërgoi sot 38,5 tonë ndihma humanitare në rajonin Sinai të Egjiptit për civilët palestinezë në Rripin e Gazës, tha një zëdhënës i Ministrisë së Jashtme. Një aeroplan transporti ”Boeing C-17” i Forcave Ajrore Indiane “që mbante gati 6,5 tonë ndihma mjekësore dhe 32 tonë materiale ndihme për popullin e Palestinës” u nis drejt aeroportit egjiptian nga El Arish. Lufta shpërtheu dy javë më parë midis Izraelit dhe Hamasit, lëvizjes islamike që sundon enklavën palestineze të Gazës, ku jetojnë 2,4 milionë banorë. Më shumë se 1 400 persona janë vrarë në Izrael nga Hamasi që nga 7 tetori, shumica e civilëve të qëlluar, djegur të gjallë ose gjymtuar në ditën e sulmit nga luftëtarët e lëvizjes islamike palestineze të kryer nga Gaza, sipas autoriteteve izraelite. Në Rripin e Gazës, të paktën 4 385 palestinezë, kryesisht civilë, janë vrarë në bombardimet e pandërprera të kryera si hakmarrje nga ushtria izraelite, sipas Ministrisë së Shëndetësisë të Hamasit. India dënoi Hamasin për “sulmin terrorist”, por gjithashtu përsëriti qëndrimin e saj të gjatë në favor të një shteti të pavarur palestinez. Pas negociatave dhe nën presionin e SHBA, ushqim, ujë dhe ilaçe, por jo karburant, mbërritën në Gaza nga Egjipti të shtunën. Hamasi kritikoi mungesën e ndihmave, pavarësisht mbërritjes së 20 kamionëve në territorin palestinez.
