Prodhimi neto vendas i energjisë elektrike në tremujorin e dytë të vitit u ul me 38.1 % duke arritur vlerën 1.647 GWh nga 2.660 GWh energji të prodhuar në tremujorin e dytë të vitit 2021. Instituti i Statistikave publikoi sot raportin mbi bilancin e energjisë elektrike, sipas të cilit, ndërsa prodhimi vendas ra, importi u rrit me gati tre herë. “Importi bruto i energjisë elektrike (energji në marrje), në tremujorin e dytë të vitit 2022, arriti vlerën 664 GWh nga 228 GWh që ishte në të njëjtën periudhë të një viti më parë, duke shënuar kështu një rritje me 2.9 herë”, thuhet në raportin e INSTAT-it. Edhe eksporti bruto i energjisë elektrike (energji në dhënie) arriti vlerën 415 GWh nga 924 GWh duke shënuar një rënie me 55.1 %. Sipas INSTAT-it, prodhimi i energjisë elektrike u realizua nga hidrocentralet publike në masën 38.3 %, nga hidrocentralet private dhe koncesionare në masën 60.9 % dhe nga të tjerë prodhues (fotovoltaik) në masën 0.8 % të prodhimit neto vendas të energjisë elektrike.https://ata.gov.al/2022/08/31/instat-importi-i-energjise-elektrike-u-rrit-me-3-here/
