IAEA: Zaporizhia përballë rrezikut të një aksidenti bërthamor

Është thelbësore të ruhet integriteti i basenit ftohës të centralit bërthamor të Zaporizhias. Është e domosdoshme që centrali të ketë ujë të mjaftueshëm për të siguruar ftohjen thelbësore të vendit, në muajt në vijim. “Ky është alarmi që ka ngritur drejtori i përgjithshëm i Agjencisë Ndërkombëtare të Energjisë Atomike, Rafael Mariano Grossi, pas shpërthimit të digës Kakhovka e cila furnizon centralin me ujë”, thuhet në faqen e IAEA-s. “Tani më shumë se kurrë, prania e forcuar e IAEA-s në centralin bërthamor te Zaporizhias është jetike për të ndihmuar në shmangien e rrezikut të një aksidenti bërthamor dhe pasojave të tij të mundshme për popullsinë dhe mjedisin, në një kohë të aktivitetit të shtuar ushtarak në rajon. “Humbja e burimit kryesor të ujit ftohës të centralit komplikon më tej situatën tashmë të vështirë dhe sfiduese të sigurisë bërthamore”, tha Grossi, i cili do të jetë në Zaporizhia javën e ardhshme. Drejtori i Përgjithshëm i IAEA-s tregoi se për t’u përgatitur për këtë eventualitet, centrali bërthamor po rimbush vazhdimisht furnizimet e tij me ujë, duke përfshirë basenin e madh ftohës pranë centralit dhe basenet më të vogla ftohëse me spërkatës dhe kanalet ngjitur, duke përdorur plotësisht ujin nga rezervuari Kakhovka. “Këto burime uji do të jenë të mjaftueshme për të furnizuar centralin me ujë, për të ftohur gjashtë reaktorët dhe karburantin e shpenzuar për disa muaj”, tha ai. “Edhe pse gjashtë reaktorët e Zaporizhias janë të gjithë në modalitetin e mbylljes, ata ende kanë nevojë për ujë ftohës për të shmangur shkrirjen e karburantit dhe një çlirim të mundshëm të materialit radioaktiv”, tha Grossi. atsh