Hyn në fuqi kufiri i çmimit të gazit në BE

Hyri sot në fuqi një mekanizëm i ndërlikuar dhe i kontestuar për të kufizuar çmimin e shitjes me shumicë të gazit të importuar në Bashkimin Evropian në rast të rritjeve të çmimeve në të ardhmen. Kufiri i çmimit të gazit u miratua nga ministrat e Energjisë të BE-së në dhjetor, pas polemikave disamujore mbi mënyrën se si të trajtoheshin çmimet e larta të gazit, pasi Rusia uli ndjeshëm importet e saj në bllok. Pasi çmimi i referencës së gazit me shumicë i bllokut arriti kulmin në afërsisht 350 euro (376 dollarë) për megavat orë në gusht, aktualisht është rreth 50 deri në 60 euro, një nivel i ngjashëm para pushtimit rus të Ukrainës. Mekanizmi i ri i çmimeve do të fillojë automatikisht nëse çmimet për kontratat tejkalojnë 180 euro për megavat orë për tre ditë radhazi. Çmimi i ri i rregulluar është 35 euro mbi çmimin global të LNG-së, që do të thotë se gazi mund të tregtohet mbi 180 euro për megavat orë në BE nëse çmimet globale të LNG-së janë të larta. Nëse kufiri do të aktivizohet gjatë kohëzgjatjes së tij njëvjeçare është e paqartë dhe varet për shembull nga sa lehtë dhe me çfarë kosto vendet e BE mund të rimbushin depozitat përpara dimrit të ardhshëm. Gjermania ishte ndër vendet që ishin veçanërisht skeptike për një masë të çmimit të gazit duke përmendur shqetësimet mbi sigurinë e furnizimit, ndërsa vendet e tjera anëtare kishin kërkuar vazhdimisht për një zgjidhje në mbarë BE-në. atsh