Ministrja e Bujqësisë dhe Zhvillimit Rural, Frida Krifca u shprehh sot se, “hidrovorët janë në funksion të plotë dhe ekipet e Drejtorisë së Ujitjes dhe Kullimit dhe strukturat përkatëse janë në terren dhe gatishmëri të plotë pa ndërprerje, në kushtet e motit me reshje intensive të shiut që ka përfshirë vendin tonë këto ditë”. Ministrja publikoi në rrjetet sociale, pamje nga puna që po kryejnë ekipet e bordit të kullimit me mjetet e rënda, për pastrimin e kanaleve kulluese, teksa shihen hidrovorët që punojnë pa ndërprerje. “Vijon puna e pandërprerë e hidrovorëve dhe ndërhyrjet me eskavatorë në kanalet kulluese në gjithë vendin”, theksoi Krifca. Ministrja bëri të ditur se, janë marrë masa dhe janë në gatishmëri të plotë edhe Drejtoritë e Veterinarisë, nëse do të ketë nevojë për lëvizjen e blegtorisë, apo për të asistuar blegtorët në rast nevoje. “Të gjithë strukturat e Ministrisë së Bujqësisë dhe Zhvillimit Rural kanë qenë në terren edhe gjatë ditës së sotme, për të ndjekur nga afër situatën e shkaktuar nga reshjet dhe për t’u ardhur në ndihmë fermerëve dhe blegtorëve përmes Autoritetit Kombëtar të Veterinarisë dhe Mbrojtjes së Bimëve”, deklaroi Krifca. ATSH
- Advertisment -