Greqia me performancën më të mirë ekonomike

Greqia është vendi, ndër 34 më të zhvilluarit, që ka shënuar “performancën më të mirë” në sferën ekonomike në vitin 2022, sipas The Economist. Studimi i të përjavshmes britanike bazohet në një sërë parametrash duke përfshirë GDP-në, inflacionin, borxhin publik dhe tendencat e tregut të aksioneve. Në periudhën ndërmjet tremujorit të dytë 2021 dhe tremujorit të tretë të 2022, PBB-ja e vendit mesdhetar u rrit me 2,2% ndërsa çmimet e konsumit në Greqi u rritën me 7,8% në 10 muajt e parë të 2022. Në rritje janë edhe çmimet e aksioneve të Bursës së Athinës (+0,8%) në 11-mujorin e 2022-ës, ndërkohë që sipas Economist vendi grek do të shquhej për uljen e borxhit publik neto, i cili do të kishte rënë me 16 pikë përqindje të PBB-së. Sipas studimit, vendet e tjera të Evropës Jugore, si Portugalia dhe Spanja, gjithashtu performuan mirë, ndërsa Gjermania u rendit e 30-ta, me Estoninë dhe Letoninë në fund të tabelës. Kryeministri grek Kyriakos Mitsotakis festoi analizën e të përjavshmes prestigjioze britanike me një koment në Twitter. “Greqia renditet e para për performancën më të mirë në 2022 midis 34 vendeve, me rritje të lartë, inflacion të ulët, rënie të raportit të borxhit ndaj PBB-së dhe performancë mbi mesataren e tregut të aksioneve. Jam shumë i kënaqur që shoh që përpjekjet dhe reformat tona po kanë një real ndikim. Mezi presim vitin 2023!” ka shkruar kryeministri konservator.https://ata.gov.al/2022/12/19/fokus-the-economist-greqia-me-performancen-me-te-mire-ekonomike-per-2022-shin-gjermania-e-30-a/