Gjykata lë në fuqi dënimin e Sarkozysë për ryshfet

Një gjykatë apeli ka lënë në fuqi dënimin e ish-presidentit të Francës Nicolas Sarkozy për ryshfet dhe abuzim me pushtetin. Në vendimin e saj të sotëm, gjykata e Parisit la në fuqi dënimin e shkallës së parë të 68-vjeçarit me tre vjet burg, dy prej të cilave u pezulluan. Çështja ende mund të apelohet në gjykatën më të lartë të Francës. Nëse dënimi konfirmohet përfundimisht, ai mund ta kryejë burgun në shtëpi nën mbikëqyrje elektronike. Ish-presidenti konservator u shpall fajtor për sigurimin e informacionit konfidencial nga prokurori Gilbert Azibert në vitin 2014 në lidhje me një çështje ligjore nëpërmjet avokatit të tij, Thierry Herzog. Në këmbim të informacionit, Azibertit iu ofrua mbështetje presidenciale për të aplikuar për një post në Monako. Prokurorët argumentuan se kjo sjellje rrezikonte pavarësinë e gjyqësorit. Sarkozy ishte i implikuar në rastin për të cilin kishte marrë informacion. Herzog dhe Azibert u dënuan gjithashtu në shkallë të parë me nga tre vjet burg, dy prej tyre të pezulluar. Kryetarja e trupit gjykues Sophie Clément tha se veprat e kryera nga Sarkozy ishin edhe më të rënda sepse ato ishin kryer nga një ish-president. Edhe pse gjykata në gjyqin fillestar vendosi që Sarkozy mund të vuante kohën në arrest shtëpiak me etiketim elektronik, dënimi ishte unik në Francë. Avokati i tij e quajti atë “jashtëzakonisht të ashpër” dhe “të pajustifikuar”. Sarkozy ishte president nga 2007 deri në 2012.atsh