Kabineti gjerman miratoi sot kufizime për bashkimin familjar për grupe të caktuara refugjatësh si edhe ligjet për nënshtetësinë.
Qeveria e re e kancelarit Friedrich Merz, e cila mori detyrën në fillim të këtij muaji, ka premtuar një goditje ndaj migracionit dhe tashmë ka futur kontrolle më të ashpra në kufijtë e vendit.
Dy projektligjet, të propozuara nga ministri i Brendshëm, Alexander Dobrindt, duhet të miratohen ende në Bundestag.
Kufizimet familjare synojnë emigrantët në Gjermani me të ashtuquajturin “status mbrojtjeje plotësuese”, të cilët lejohen të qëndrojnë në vend për shkak të kërcënimit të persekutimit politik në vendet e tyre të origjinës, pavarësisht mungesës së statusit formal të refugjatit.
Projektligji thotë se pothuajse 400 000 qytetarë kanë mbrojtje plotësuese.
Rreth tre të katërtat thuhet se janë shtetas sirianë, shumë prej të cilëve ikën nga lufta civile shkatërruese e vendit.
Këta qytetarë nuk do të lejohen më të sjellin anëtarët e familjes së tyre në Gjermani për një periudhë fillestare prej dy vitesh, duke rikthyer një politikë që më parë zbatohej nga viti 2016 deri në vitin 2018.
Që atëherë, një total prej 12 000 anëtarësh të familjeve të banorëve me status mbrojtjeje plotësuese kanë qenë në gjendje të lëvizin në Gjermani çdo vit.
Si masë krahasimi, 229 751 kërkesa për azil për herë të parë u paraqitën në Gjermani vitin e kaluar, gjë që tregon se masa e qeverisë synon vetëm një grup të vogël migrantësh.
Dobrindt ka argumentuar se politika dërgon një sinjal se qeveria e re e Gjermanisë po ndryshon kursin ndaj migracionit, duke kërkuar të zvogëlojë “faktorët tërheqës”.
Ndryshe nga propozimet e tjera për të ulur më tej numrin e migrantëve që vendosen në Gjermani, masa nuk ka gjasa të përballet me pengesa ligjore.
Por, kritikët argumentojnë se masa mbyll rrugët ligjore dhe të sigurta për refugjatët për të hyrë në Gjermani.
“Kjo është një katastrofë për familjet e prekura”, tha Tareq Alaows nga grupi i refugjatëve ”Pro Asyl”.
Eksperti i migracionit, Herbert Brucker tha se studimet tregojnë se “ndarja nga familja është psikologjikisht shumë stresuese për refugjatët dhe në këtë mënyrë pengon edhe integrimin e tyre”.
