Rripi i Gazës mund të jetë në prag të një krize të re humanitare nëse furnizimet nuk lejohen, thonë autoritetet, ndërsa Izraeli po u përgjigjet sulmeve të Hamasit, sipas BBC. Dje, Izraeli shpalli një “rrethim të plotë” në territor, duke thënë se energjia elektrike, ushqimi, karburanti dhe uji do të ndërpriteshin. Sipas banorëve, ndihma në këtë anklavë nuk ka arritur që nga e shtuna. Pamjet e Gazës tregojnë rrugë të shkreta, të mbuluara me rrënoja nga ndërtesat e shembura pas sulmeve ajrore izraelite. Gati 700 njerëz kanë vdekur në këto sulme dhe mijëra të tjerë raportohet se janë plagosur. Gaza ka 2,3 milionë banorë, 80% e të cilëve mbështeten në ndihma humanitare kryesisht për shkak të armiqësive të vazhdueshme me Izraelin. Ajo drejtohet nga militantët e Hamasit, por Izraeli kontrollon hapësirën ajrore dhe vijën e saj bregdetare. Ai gjithashtu kufizon se kush dhe çfarë mallrash mund të kalojnë kufijtë e tij. Egjipti fqinj kontrollon rreptësisht se çfarë ose kush mund të kalojë edhe përmes kufirit të tij me Gazën. Që nga fillimi i sulmeve, të shtunën në mëngjes, Izraeli ka ndaluar të gjitha furnizimet që hyjnë në Gaza, përfshirë ushqimin dhe ilaçet. Stephane Dujarric, zëdhënës i sekretarit të përgjithshëm të OKB-së, tha se më shumë se një duzinë punonjës të kujdesit shëndetësor ishin vrarë ose plagosur dhe të paktën shtatë qendra mjekësore ishin dëmtuar. Ndërkohë, shumë njerëz aktualisht janë pa energji elektrike dhe internet dhe së shpejti mund të jenë pa furnizime thelbësore me ushqim dhe ujë. “Dëmtimi i objekteve të ujit, kanalizimeve dhe higjienës ka dëmtuar shërbimet për më shumë se 400 000 banorë”, tha Dujarric. Termocentrali i Gazës është tani i vetmi burim i energjisë elektrike. Edhe para kufizimeve të fundit, banorët e Gazës përballeshin me pasiguri të madhe ushqimore, kufizime në lëvizje dhe mungesë uji. Ministri izraelit i Infrastrukturës urdhëroi ndërprerjen e menjëhershme të furnizimit me ujë në Gaza duke thënë se “ajo që ishte në të kaluarën nuk do të jetë më në të ardhmen”
- Advertisment -