Agjencia kombëtare e fatkeqësive tha se mbi 900,000 njerëz ishin evakuuar në provincat lindore, qendrore dhe veriore në rrugën e tajfunit.
Energjia elektrike është ndërprerë në disa pjesë të provincave lindore përpara mbërritjes së pritshme të tajfunit “Fung-Wong” dje në mbrëmje.
“Ne i bëjmë përsëri thirrje qytetarëve të përgatiten, të ndjekin paralajmërimet dhe të zbatojnë masat parandaluese ndërsa tajfuni afrohet”, tha Bernardo Rafaelito Alejandro, zëvendësadministrator i zyrës kombëtare të mbrojtjes civile.
“Ne po i kërkojmë të gjithëve të bashkëpunojnë, por të qëndrojnë të qetë. Kemi protokolle për të ndjekur dhe kjo është për sigurinë tonë”, shtoi ai.
Byroja e motit tha se tajfuni “Fung-Wong” po kalonte shumë afër provincës lindore të Catanduanes sot në mëngjes, duke u shoqëruar me erëra maksimale të qëndrueshme prej 185 kilometrash në orë (kilometra/orë) dhe shpërthime deri në 230 kilometra/orë.
Stuhia po lëvizte nga perëndimi në veriperëndim me 25 kilometra/orë dhe pritet të zbarkojë mbi provincën veriore, Aurora sot në mbrëmje ose nesër në mëngjes.
“Rreth 8,4 milionë njerëz mund të preken potencialisht nga tajfuni “Fung-Wong”, përfshirë 5,7 milionë që jetojnë në komunitete bregdetare”, sipas të dhënave të qeverisë.
Filipinet goditen nga një mesatare prej rreth 20 ciklone tropikale në vit.
Një nga stuhitë më të forta që ka goditur ndonjëherë vendin ishte Super Tajfuni “Haiyan” në nëntor 2013, i cili shkaktoi vdekjen e mbi 6 300 njerëzve
