Qeveria parashikon ndërtimin e aksit të ri rrugor Dhërmi-Sarandë.
Rruga e re parashikon të shmangë kalimin nëpër zonat e banuara për të lehtësuar qarkullimin.
Autoriteti Rrugor Shqiptar ka çelur garën për studimin dhe projektimin e saj me një fond limit prej rreth 82 milionë lekësh.
Gjurma e rrugës që duhet studiuar pritet të kalojë në katër bashki të ndryshme, që janë Delvina, Himara, Finiqi dhe Saranda.
Të gjitha këto bashki kufizohen mes njëra-tjetrës dhe ndodhen në pjesë jugore të vendit tonë.
Ajo që kërkohet në termat e referencës është studimi dhe hartimi i një projekti të detajuar që merr për bazë dhe zbaton standardet e rregullores teknike të projektimit dhe ndërtimit të rrugëve, për aksin rrugor “Rruga e Bregut” (Dhërmi – Sarandë).
Segmenti rrugor do klasifikohet si kategoria C2 “rrugë ndërurbane dytësore”, në përputhje dhe vazhdimësi edhe me segmentin rrugor tashmë të ndërtuar (Palasë – Dhërmi).
Si fillim projekti (km 0+000) do të merret fundit (rrethrrotullimin) i segmentit rrugor Palasë – Dhërmi.
Rruga e Bregut është e vetmja që lidh shumë zona të banuara bregdetare, ndër të cilat fshati Dhërmi, fshati Ilias, kryqëzimi për në Manastirin e Shën Teodorit, fshati Vuno, Jala, qyteti i Himarës, fshati Livadh, Porto Palermo, fshati Qeparo, fshati Borsh, Piqeras, Bunec, Lukovë, Shën Vasil, Nivicë e Kakome.
Rruga ekzistuese Dhërmi – Sarandë përshkon një terren kordinor dhe pjesërisht malor, me gjerësi të pjesës kaluese 6 m, me 2 bankina të paasfaltuara nga 0.5 m dhe 0.75m, me një profil gjatësor deri në 10 % pjerrësi në shumë zona, me kthesa që janë jashtë standartit. Ky aks rrugor ka vepra të shumta arti si ura, mure mbajtës e pritës, tombino të ndryshme. Në disa segmente rrugore ka zona aktive rrëshqitëse.
Segmenti rrugor Palasë – Dhërmi, pjesë e rrugës së Bregut, me një gjatësi rreth 4.2km, është tashmë i ndërtuar dhe shftytëzohet si nga banorët e zonave përreth, ashtu edhe nga gjithë pushuesit e rivierës së vendit tonë.
