“Food4Health”, mbështetje fermerëve e prodhuesve

Zbatimi i projektit ndërkufitar Shqipëri, Itali, Mali i Zi, “Food4Health”, i financuar nga Bashkimi Evropian, nëpërmjet Instrumentit të Asistencës Financiare të Bashkëpunimit (Interreg), pritet të nxisë përmirësimin e zinxhirit të vlerës për produktet tipike lokale. Ministrja e Bujqësisë dhe Zhvillimit Rural, Frida Krifca, njëherazi Presidente e CIHEAM, në vizitën zyrtare që po zhvillon në Itali, gjatë mbledhjes së Bordit Drejtues të CIHEAM, u ndal edhe në Tricase, në Qendrën e Institutit Agronomik Mesdhetar (CIHEAM), me të cilët dhe në bashkëpunim me rajonin e Puglias, rajonin e Molises, po zbatohet ky projekt. Sipas njoftimit të Ministrisë së Bujqësisë, bëhet me dije se, ministrja Krifca vizitoi laboratorin e komunitetit “FOOD4HEALTH”, në Tricase, i ndërtuar si nismë e projektit “Interreg”, me qëllim transmetimin e teknologjive për përpunimin e produkteve të fermerëve të vegjël dhe peshkatarëve, të certifikuara sipas standardeve ndërkombëtare. “Pata mundësinë të shikoj nga afër implementimin e aktiviteteve që po ndërmerren në kuadër të qasjes së përbashkët rajonale për zhvillimin ekonomik të komuniteteve lokale. Me partnerët italianë dhe ata nga Mali i Zi, shkëmbyem eksperiencat e deritanishme, të cilat kanë si synim mbështetjen e fermerëve dhe prodhuesve të vegjël dhe të mesëm”, tha Krifca. Përmes këtij projekti, vijoi ministrja, nxitet përmirësimi i zinxhirit të vlerës për produktet tipike lokale, duke i mbështetur ata në rritjen e konkurrueshmërisë dhe gjetjen e tregjeve të reja. Krifca: Inkubatorë për përpunimin e peshkut dhe frutave në Vlorë dhe Korçë Ministrja Krifca gjatë vizitës në laboratorin e Tricases, i cili i shërben komunitetit lokal dhe bizneseve të zonës, tha se, “shembuj të tillë të suksesshëm po zbatojmë edhe në Shqipëri, në QTTB-në e Vlorës dhe Korçës për përpunimin e peshkut dhe frutave”. Ministrja informoi se, po shkon drejt përfundimit puna për ngritjen e inkubatorit të përpunimit të frutave në Korçë dhe atij të përpunimit të peshkut në Vlorë, si pjesë e projektit “Food4Health”. Në inkubatorin e Korçës do të përpunohen prodhimet autoktone të zonës: mollë, qershi dhe kumbull, 3 nga llojet e frutave që kultivohen masivisht nga fermerët e Qarkut Korçë. Ndërsa inkubatori i Vlorës i vjen në ndihmë peshkatarëve të vegjël për përpunimin e peshkut. Me këto investime qeveria shqiptare synon mbështetjen e fermerëve të vegjël, zhvillimin e zinxhirit ushqimor dhe përmirësimin e cilësisë së produktit sipas standradeve më të mira, që kërkon tregu. Ngritja e dy inkubatorëve është pjesë e një projekti ndërkufitar, i cili vjen si një bashkëpunim i ri, me qëllim që t’i japë më shumë vlerë prodhimit autokton. Në to do të përpunohen për t’u kthyer në reçel, frutat e cilësisë së dytë e të tretë, të cilat nuk kanë mundësi të dalin në treg apo të grumbullohen në frigoriferë dhe e njëjta gjë edhe për peshkun në Vlorë. Produkti final nga këto inkubatorë do të jetë i certitifikuar sipas standardeve të BE-së, me qëllim rritjen e konkurrueshmërisë së produktit shqiptar në tregun vendas dhe atë të eksportit. Sipas agjendës së aktiviteteve, vizita zyrtare e ministres Krifca në Itali, po vijon me një takim me kryetarin e bashkisë së Tricase-s, Antonio De Donno, të cilin e falenderoi për mikpritjen dhe bashkëpunimin e ofruar në realizimin me sukses të këtij projekti, ku Ministria e Bujqësisë dhe Zhvillimit Rural është partner drejtues. atsh