Fermerët në Fier kanë shtuar sipërfaqet e tokave të mbjella me luleshtrydhe ku mbi 80% të këtij prodhimi e eksportojnë në tregjet europiane. Ministria e Bujqësisë dhe Zhvillimit Rural përmes politikave dhe mekanizmave të financimit po i mbështet fermerët e këtij sektori që kultivojnë “frutin e kuq” kryesisht në serra, sipas teknologjive më të mira. Skema e naftës falas për bujqësinë, nga e cila kanë përfituar pothuajse të gjithë fermerët e zonës, por edhe subvencionimi për plasmasin në serra janë lehtësi që u janë kthyer në më shumë të ardhura familjeve fermere. Trendi dhe modeli i biznesit të luleshtrydhes është kthyer në pasion edhe për shumë të rinj të zonës, që po angazhohen në bujqësi duke aplikuar dhe projekte novatore për të konkurruar sa më mirë në tregun me prodhime cilësore dhe të bollshme. Marsi shënon edhe nisjen e sezonit të vjeljes së luleshtrydhes dhe fermerët në qarkun e Fierit janë në kulmin e punës. Prodhimi është i mbarë dhe cilësor ndaj tregun e kanë të sigurtë. Kultivimi i luleshtrydhes është kthyer në biznes fitimprurës për fermerët e kësaj zone. Në Frakull luleshtrydhja tregtohet me shumicë 210 deri në 240 lek për kg, por vetëm 15% e prodhimit mbetet për tregun vendas. Me një prodhim prej 75 mijë kuintalësh në sezon, luleshtrydhja e Frakullës eksportohet në Itali, Rumani, Poloni e Çeki. Vetëm në Frakull të Fierit janë mbi 280 fermerë që kultivojnë luleshtrydhen me një sipërfaqe totale prej 170 ha. Pjesa më e madhe e tyre janë mbështetur nga Ministria e Bujqësisë me subvencione si për naftën ashtu dhe për ndërtimin e serrave. atsh
- Advertisment -