Fatkeqësitë në vitin 2022 lidhen me ndryshimet klimatike

Dhjetë stuhitë, përmbytjet dhe thatësirat në 2022, kanë shkaktuar dëme me vlerë, të paktën 3 miliardë dollarë në një vit, secila, sipas një raporti të publikuar nga agjencia e ndihmës dhe zhvillimit të 41 kishave të krishtera në BM dhe Irlandë, “Christian Aid”. “Christian Aid” ka nxjerrë në pah fatkeqësitë më të këqija të vitit të lidhura me ndryshimet klimatike, pasi bota po përballet me stuhi intensive, rrebeshe të mëdha dhe thatësira të shkaktuara nga rritja e temperaturave globale si rezultat i aktivitetit njerëzor. Uragani “Ian” pati ndikimin më të madh financiar, duke shkaktuar dëme me vlerën e 100 miliardë dollarëve, pasi goditi SHBA-në dhe Kubën në shtator. “Uragani shkaktoi vdekjen e 130 banorëve dhe zhvendosjen e më shumë se 40 000 njerëzve”, sipas raportit. Ndikimi më i madh për sa i përket kostove njerëzore ishin përmbytjet në Pakistan në qershor deri në shtator, të cilat shkencëtarët zbuluan se ndodhën për shkak të ndryshimeve klimatike, duke shkaktuar 1 739 vdekje dhe duke zhvendosur 7 milionë njerëz. “Përmbytjet shkaktuan dëme me vlerë 5.6 miliardë dollarë, megjithëse kostoja e vërtetë e përmbytjeve shkatërruese vlerësohet të jetë më shumë se 30 miliardë dollarë”, tha “Christian Aid”. ATA