Evropa po digjet! Disa shtete shpallin alarmin e kuq, po Shqipëria? Flasin ekspertët

Vendi ynë po përballet prej ditësh me temperatura të larta për shkak të valës së të nxehtit që ka përfshirë të gjithë Evropën. Dy deri tre qarqe të vendit po përjetojnë temperatura ekstreme. Ndërsa gati e gjithë Evropa ka vendosur alarmin e kuq, në Shqipëri ende nuk është marrë një masë e tillë. Meteorologia e Metoalb, Lajda Porja ka shpjeguar se përse në vendin tonë ende nuk është vendosur alarm i kuq. Ajo shprehet se numri i ditëve me temperatura të larta duhet të jetë mbi 5-6, ndërsa vendi ynë pritet të përballet me temperatura ekstreme tre ditë. “Ndodh kur numri i ditëve me temperature të larta është i lartë dhe kalojnë  pesë deri në gjashtë ditë në valën e të nxehtit afrikan. Kjo valë është 21 ditë me temperatura mbi 40 gradë. Shqipëria ka vetëm tre ditë, sot, nesër dhe pasnesër pritet. Evropa, Italia, Greqia, Spanja kanë shumë ditë dhe janë me temperaturë 42 gradë në dy apo tre qarqe”, tha meteorologia Lajda Porja. Temperaturat maksimale sot kanë prekur vlerat 41 gradë Celcius në Shkodër, Elbasan dhe Berat. Qendra e koordinimit të reagimit ndaj emergjencave të BE-së lëshoi ​​alarme të kuqe për temperatura të larta për pjesën më të madhe të Italisë, Spanjën verilindore, Kroacinë, Serbinë, Bosnjën dhe Hercegovinën jugore dhe Malin e Zi. Në Greqi, në ditët në vijim parashikohet një valë të nxehti deri në 44 gradë Celsius në disa pjesë të vendit. Ambulancat janë në gatishmëri në Akropol për shkak të të fikëtve turistëve nga vapa. Autoritetet kanë ndaluar hyrjen në rezervatet natyrore dhe pyjet për të zvogëluar rrezikun e zjarreve, ndërsa bashkitë kanë hapur zona me ajër të kondicionuar në ndërtesat publike për njerëzit që të strehohen nga nxehtësia. Turqia, gjithashtu, pa temperaturat maksimale prej 44°C  ditët e fundit,  në Qipro ato mund të shkojnë deri në 42°C, ndërsa në Malin e Zi do shkojë në 40°C. Serbia mund të përballet me 38°C të martën e ardhshme, ndërsa Rumania deri të shtunën mund të arrijë 39°C . Pjesë të Kroacisë presin temperatura që do shkojnë në 34°C. Në Itali, temperaturat në ishullin e Sardenjës arritën në 45 gradë Celsius dhe në Romë arritën në 40 gradë Celsius të martën, pasi Ministria e Shëndetësisë lëshoi ​​alarme të kuqe të motit për 20 nga 27 qytetet kryesore të vendit, me numrin që pritet të rritet në 23 sot. Nga ana tjetër, Organizata Botërore e Shëndetësisë ka paralajmëruar qytetarët, kryesisht të moshuarit dhe personat vulnerabël, për kujdes të shtuar në përballimin e të nxehtit përvëlues. Kujtojmë se rreth 61,000 njerëz mund të kenë vdekur nga valët e të nxehtit vitin e kaluar vetëm në Evropë . TCH