Një prani e madhe policore do të ruajë presidentin turk Recep Tayyip Erdogan gjatë vizitës së tij në Gjermani, ku ai do të takohet me kancelarin Olaf Scholz. Vizita pritet me shumë vëmendje për shkak të deklaratave të Erdoganit për luftën Izrael-Hamas në Rripin e Gazës. Presidenti turk ka shkaktuar zemërim me disa deklarata mbi konfliktin e Gazës, pas sulmeve terroriste nga militantët e Hamasit më 7 tetor në Izrael, ku u vranë rreth 1 200 persona. Sulmet hakmarrëse të Izraelit në Gaza kanë vrarë deri më tani më shumë se 11 000 palestinezë. Presidenti turk e përshkroi Hamasin si një “organizatë çlirimtare” dhe dënoi veprimin ushtarak izraelit si një krim lufte duke e akuzuar Izraelin për “terrorizëm shtetëror”. Hamasi është klasifikuar si organizatë terroriste nga Bashkimi Evropian dhe SHBA. Gjatë vizitës së Erdoganit në Berlin, e cila pritet të zgjasë vetëm disa orë, janë planifikuar disa demonstrata. Scholz e konsideron Erdoganin një partner të rëndësishëm dialogu për çështje të tilla si kontrolli i imigracionit në Evropë. Kancelari e ftoi Erdoganin në Berlin pas rizgjedhjes së tij si president në maj. Policia do të vendosë rreth 1 500 oficerë që do të ruajnë zonat përreth kancelarisë.
