Presidenti turk Recep Tayyip Erdogan, në një bisedë telefonike me homologun e tij amerikan, Joe Biden, tha se është “përgjegjësi historike” e Amerikës që të sigurojë një armëpushim të përhershëm në Gaza sa më shpejt të jetë e mundur. Siç njoftoi Drejtoria e Komunikimeve të Turqisë, Erdogan dhe Biden patën një bisedë telefonike për të diskutuar sulmet e Izraelit në territoret palestineze, veçanërisht në Gaza, marrëdhëniet dypalëshe dhe aplikimin e Suedisë për anëtarësim në NATO. Erdogan tha se një armëpushim mund të arrihet shpejt nëse Shtetet e Bashkuara tërheqin “mbështetjen e pakushtëzuar” për Izraelin. Ai i tha Bidenit se tragjedia njerëzore në Gaza duhet të marrë fund dhe paralajmëroi se intensifikimi dhe zgjatja e sulmeve nga Izraeli mund të ketë “pasoja negative rajonale dhe globale”. Presidenti turk për zgjidhjen e konfliktit izraelito-palestinez theksoi nevojën e krijimit të një mekanizmi garantues, siç sugjeroi Turqia. Më tej, Erdogan theksoi se krijimi i një shteti të pavarur dhe sovran palestinez me kryeqytet Jerusalemin bazuar në kufijtë e vitit 1967 është “zgjidhja më e arsyeshme dhe e përhershme”. Të dy presidentët diskutuan gjithashtu ofertën e Ankarasë për të blerë avionë luftarakë F-16 nga Shtetet e Bashkuara.
