Eksportet e Kinës me rritje të ngadaltë, importet në rënie

Eksportet e Kinës u rritën me një ritëm më të ngadaltë në prill dhe importet patën një rënie të fortë duke sinjalizuar se rikthimi i pritshëm në ekonomi, pas heqjes së kontrolleve të Covid-19, nuk ka gjasa të zgjasë shumë. ”Eksportet shënuan një rritje vjetore prej 8,5% në muajin prill”, njoftoi të martën Administrata e Përgjithshme e Doganave. Ekonomistët kishin parashikuar që dërgesat të rriteshin me 8,0%, pas një fitimi prej 14,8% në mars. Nga ana tjeter importet ranë me 7,9% në vit, që ishte shumë më e madhe se rënia e marsit me 1,4% dhe parashikimi i ekonomistëve për një rënie prej 5,0%. Si rezultat, bilanci tregtar tregoi një suficit prej 90,21 miliardë dollarë në prill. Ky ishte mbi nivelin e pritur prej 71,6 miliardë dollarësh. Suficiti arriti në 88,2 miliardë dollarë në mars. Eksportet në SHBA u ulën me 6,5% nga një vit më parë dhe importet ranë rreth 3% në prill. Sondazhi i fundit i Menaxherëve të Blerjeve tregoi se biznesi i ri i eksporteve u rrit vetëm pak në prill pas një reduktimi të pjesshëm në mars. Rritja e sektorit privat u moderua në prill nga niveli më i lartë i nëntë muajve. Megjithëse ritmi i rritjes ishte më i ngadaltë që nga janari, zgjerimi i përgjithshëm ishte solid. Të dhënat zyrtare të fundit sugjeruan se ekonomia e Kinës u rimëkëmb në fillim të vitit, pas heqjes së kufizimeve të lidhura me pandeminë. Ekonomia u rrit me një ritëm më të shpejtë prej 4,5% në tremujorin e parë pas rritjes prej 2,9% të shënuar në tremujorin e katërt të 2022. Fondi Monetar Ndërkombëtar kishte parashikuar që ekonomia e Kinës të rritej me 5,2% këtë vit dhe 4,5% në 2024. atsh