Banka e Shqipërisë bëri të ditur se në tremujorin e tretë të këtij viti, portofoli i kredisë për individët arriti në vlerën 267 milionë lekë. Krahasuar me tremujorin paraardhës ky tregues u rrit me 2.8% ose me 7.2 milionë lekë më shumë. Sipas BSH-së, gjatë kësaj periudhe Durrësi është qarku që ka shënuar rritjen më të lartë të kredisë me 44%, ndjekur nga qarku i Tiranës me 3.3%. Më pas vjen Elbasani, që e ka zgjeruar portofolin e huave me 2.6%, ndërsa qarqet e tjera si Korça, Vlora dhe Fieri kanë shënuar një rritje të nivelit të huasë nga 1.4% deri në 2%. BSH-ja vëren se, huaja për blerje banesash ka rënë në të gjitha qarqet përjashtuar qarkun e Tiranës, ku ka patur një rritje prej 4.6%. Ndërkohë kredia për konsum ka shënuar rritje në të gjitha qarqet. Rritja më e lartë rezulton në qarkun e Durrësit me 24.8% dhe në qarkun e Elbasanit me 10.16%, ndërsa qarqet e tjera kanë pasur rritje më të lehtë.
