Një adhuruese e maceve gjatë gjithë jetës, ajo ua la atyre një pjesë të pasurisë së saj.
Përafërsisht 150 000 euro do të dhurohen në strehën komunale të maceve endacake të Romës, në mënyrë që të përkujdesen për to.
Ky është një gjest dashurie ndaj miqve katërkëmbësh të Romës nga Lucilla Vespucci, një bibliotekare e vjetër në universitetin ”La Sapienza”, drejtoreshë e Departamentit të Matematikës së bibliotekës dhe një aktiviste e përkushtuar ndaj punës sociale dhe mirëqenies së kafshëve, e cila ndërroi jetë më 10 janar.
“Njëzet e pesë për qind e investimeve të mia financiare do të dhurohen në strehën komunale të maceve ‘Muratella’ në Romë për blerjen dhe mirëmbajtjen e mobilieve dhe pajisjeve që do t’i ndihmojnë macet e mia të dashura të jetojnë në kushte më të rehatshme”, deklaroi ajo në testamentin e saj të fundit.
Në testamentin e saj, Lucilla Vespucci la 156 617 euro për strehën ”Muratella” për macet endacake.
Testamenti përfshin gjithashtu një kërkesë për një pllakë përkujtimore në nder të saj dhe Alfonso Vignolit, bashkëshortit të saj, një matematikan dhe ekspert për Rusinë, i cili vdiq në vitin 2019.
“U preka vërtet nga gjesti bujar i zonjës Vespucci. Ajo ishte një grua me vlera të mëdha, e cila iu përkushtua kaq shumë përfshirjes së saj aktive në rrjetin e shoqatave në lagjen ‘Esquilino’ duke u mësuar italisht të huajve në ‘Casa dei Diritti Sociali’ dhe mbrojtjes së kafshëve të qytetit, të cilat i donte shumë”, thotë Sabrina Alfonsi, këshilltare për Bujqësinë, Mjedisin dhe Menaxhimin e Mbeturinave për Romën.
“Kjo është arsyeja pse duam ta mbajmë gjallë kujtimin e saj me një pllakë përkujtimore që do të vendoset në strehën e qenve dhe maceve ‘Muratella’, objekti bashkiak që do të përfitojë nga donacioni i saj”, theksoi ajo.
