Kryeministri i Kosovës, Albin Kurti, në përvjetorin e 27-të të masakrës së Srebrenicës, deklaron se ajo çfarë ka ndodhur në Srebrenicë nuk është asgjë më pak se gjenocid, asgjë më pak se shënjestrim i qëllimshëm i viktimave për shkak të ekzistencës së tyre. Përmes një postimi në rrjetet sociale, Kurti shprehet se “kur Raphael Lemkin në librin e tij “Axis Rule in Occupied Europe” kishte përdorur termin GJENOCID për herë të parë, dyshoj të ketë konsideruar mundësinë e diskrepancës mes aspektit teorik dhe praktik të termit. Dyshoj shumë që kur Lemkin ka folur për gjenocidin, të ketë menduar që dikush në shekullin 21 do të arrijë të ndërtojë një narrativë të tërë diskutimi bazuar në mohimin e gjenocidit”. Sipas tij, gjenocidi si fjalë nuk është zbuluar për t’u mohuar. “Por për të potencuar egërsinë dhe johumanitetin e krimeve që shkojnë përtej asaj që termet si krime lufte e krime kundër njerëzimit përfshijnë. Ende sot, gjenocidi nënkupton ndërmarrjen e veprimeve me qëllim të shkatërrimit (të plotë ose të pjesshëm) të grupeve në aspektin kombëtar, etnik, racor ose fetar. E çka ka ndodhur në Srebrenicë para 27 viteve nuk është asgjë më pak se gjenocid. Asgjë më pak se shënjestrim i qëllimshëm i viktimave për shkak të ekzistencës së tyre”, thekson Kryeministri i Kosovës. Ai shton se dëmi i shkaktuar nga gjenocidi i Srebrenicës është i shumëfishtë. “Ai shkon përtej 8.273 burrave dhe djemve të vrarë. Përtej 30 mijë fëmijëve e pleqve të abuzuar e të shpërngulur me dhunë. Dëmi i shkaktuar transferohet secilin vit te dhimbja e nënave. Lotët e motrave. Traumat e përjetuara. Vuajtjet e pakontrolluara. Dëmi i shkaktuar nga gjenocidi nuk mund të riparohet. Por ai mund të njihet duke u pranuar. E në kohën kur jetojmë ne, viktimave u vendoset kripë në plagë secilën ditë kur gjenocidi i Srebrenicës mohohet paturpshëm nga Serbia. Kur roli i atij agresioni të tmerrshëm minimizohet deri në pafundësi”, deklaron Kurti. Kur organet që do të duhej të dilnin e të kërkonin falje me përulje, vijon Kryeministri, dalin e paturpësisht mohojnë ekzistencën e gjenocidit. “Në kohëra si këto, duhet të kujtojmë që hapi i parë i përsëritjes së gjenocidit është mohimi. Andaj duhet të jemi të vëmendshëm e të zëshëm në përkujtimin tonë dhe kërkesat tona për njohje dhe përulësi ndaj një prej gjenocideve më makabre të ndodhur në Evropën e pas Luftës së Dytë Botërore”, përfundoi Kryeministri i Kosovës. Kuvendin e Shqipërisë miratoi të enjten me 113 vota pro Rezolutën e propozuar nga deputetët e Partisë Socialiste për dënimin e gjenocidit në Srebrenicë. Krahas dënimit të mohimit të gjenocidit në Srebrenicës, rezoluta e Kuvendit të Shqipërisë, po ashtu, synon të dënojë retorikën politike që nxit urrejtjen ndëretnike duke mohuar gjenocidin në Srebrenicë dhe krimet e tjera të luftës të kryera në luftërat e ish-Jugosllavisë. Që prej miratimit të Rezolutës në Kuvend, 11 korriku është edhe në Shqipëri Dita e Përkujtimit dhe nderimit të viktimave të gjenocidit Serb në Srebrenicë.
https://ata.gov.al/2022/07/11/kurti-27-vjet-dhimbje-e-mall-nga-gjenocidi-i-srebrenices/
