Depozitat në euro u rritën në 6.5 miliardë në prill

Rritja e depozitave në euro vijoi edhe në muajin prill. Sipas Bankës së Shqipërisë, depozitat bankare në monedhën europiane arritën afër vlerës së 6.5 miliardë eurove. Krahasuar me një vit më parë, ky tregues shënoi një rritje vjetore me 16.7%. Vetëm gjatë muajit prill, segmenti i kësaj depozite u rrit me 73 milionë euro, ndërsa që nga fillimi i vitit rritja e tyre ka arritur në 180 milionë euro. Shifrat tregojnë se rritja e depozitave në euro paraqitet e shpërndarë me ritme të ngjashme, si mes bizneseve, ashtu edhe mes individëve. Rritja paraqitet veçanërisht e lartë në segmentin e depozitave me afat, me pothuajse 26% më shumë krahasuar me një vit më parë. BSH-ja vëren se, rritja në segmentin e depozitave me afat në euro, është e lidhur me rritjen e normave të interesit. Zgjerimi i depozitave në euro favorizon si pasojë edhe një rritje të kreditimit të ekonomisë në euro, tendencë që është bërë edhe më dominuese në tremujorin e parë të këtij viti. atsh