Çështja e detit me Greqinë: Autorizimi në përputhje me ligjet shqiptare dhe ndërkombëtare

Presidenti Bajram Begaj theksoi sot se “autorizimi për grupin negociator të çështjes së detit me Greqinë duhet të përmbushë disa kritere paraprake, kushtetuese edhe ligjore, të cilat duhet të jenë të kornizuara sipas vendimit nr.15 të Gjykatës Kushtetuese të vitit 2010”. I pyetur nga gazetarët gjatë konferencës së përbashkët për shtyp me presidenten e Kosovës, Vjosa Osmani, se kur do ta japë ai autorizimin e ri për grupin negociator, Begaj tha se “lëshimi i autorizimit të Presidentit të Republikës për çdo negociatë apo marrëveshje ndërkombëtare është detyrim ligjor”. “Aktualisht jemi në fazën e shqyrtimit të këtij relacioni për të bërë të mundur që autorizimi që do të lëshohet do të jetë në përputhje me Kushtetutën e Shqipërisë, në përputhje të plotë me vendimin e Gjykatës Kushtetuese, me ligjet shqiptare dhe ligjet ndërkombëtare”, tha Begaj. Presidenti Begaj u shpreh se “sapo ky autorizim të firmoset do të bëhet me dije edhe për publikun”.