Mbretëria e Bashkuar është gati të përcaktojë përgjigjen e saj ndaj vdekjes së liderit të opozitës ruse Alexei Navalny, me sekretarin e Jashtëm Cameron që i drejtohet presidentit Vladimir Putin duke i thënë se “ne i përputhim fjalët tona me veprimet”. Cameron do të dënojë gjithashtu luftën e Rusisë në Ukrainë dhe do të theksojë nevojën që kombet t’i përmbahen rendit ndërkombëtar të bazuar në rregulla, kur të flasë sot në një takim të ministrave të Jashtëm të G20-s në Rio de Zhaneiro.
Ish-kryeministri do të përdorë gjithashtu paraqitjen e tij në samit për të përsëritur thirrjen e tij për një pauzë të menjëhershme në luftimet në Gaza për të marrë më shumë ndihmë për popullatën e rrethuar që ka vuajtur nën sulmin ushtarak të Izraelit dhe për të lejuar lirimin e pengjeve të kapur nga Hamasi. Sekretari i Jashtëm dhe homologët e vendeve të tjera të mëdha do të theksojnë atë që ata e shohin si një sulm ndaj normave ndërkombëtare, duke filluar nga Rusia deri te sulmet e rebelëve Houthi në Detin e Kuq. SHBA ka premtuar “paketën e saj të madhe të sanksioneve”, si kundërpërgjigje ndaj vdekjes së Navalnyt.
Cameron pritet të përcaktojë pasojat që do të përballet Rusia nga Britania e Madhe. ”Ne duhet të përshtatim rregullat dhe institucionet ndërkombëtare me sfidat me të cilat përballemi sot. Kjo do të thotë të reformosh rendin ndërkombëtar të bazuar në rregulla, jo ta shkatërrosh atë”, tha ai. ”Kremlini i bën jehonë koncepteve si sovraniteti, ndërkohë që i minon hapur ato.
Ndryshe nga Rusia, ne i përputhim fjalët tona me veprimet”, theksoi ai. Kremlini ka hedhur poshtë sugjerimet se është fajtor për vdekjen e Navalnyt, në një koloni penale të Arktikut. Lavrov, homologu rus i Cameronit, pritet të jetë në mesin e ministrave të Jashtëm në mbledhjen e G20-s. Cameron do të shkojë të premten në Nju Jork për një seancë të Kombeve të Bashkuara për Ukrainën.
