Borxhi publik zbret në 67.5 % të PBB-së në vitin 2023

Borxhi total publik në vitin 2023 pritet të zbresë në rreth 67.5% të PBB-së, nga rreth 68.8% i pritshëm për këtë vit, apo nga rreth 73.2% i rezultuar për vitin 2021. Borxhi publik aktualisht përbëhet nga borxhi i brendshëm, i cili zë 51.3% të totalit të borxhit, dhe borxhi i jashtëm, i cili zë 48.7 % të tij. “Viti 2022 ka qenë një vit atipik për sa i përket borxhit publik dhe huamarrjes së brendshme në veçanti, duke qenë se kushtet e tregut kanë qenë jo të favorshme. Ndërkohë që treguesi i peshës së borxhit të jashtëm ka pësuar një ulje nga ai i fundit të vitit 2021, ku ky tregues vlerësohej në 49.2%. Ne synojmë uljen e mëtejshme të tij në afatmesëm, në linjë edhe me strategjinë afatmesme të menaxhimit të borxhit publik, e cila është miratuar së fundmi nga Këshilli i Ministrave dhe është publike në faqen e Ministrisë”, tha ministrja e Financave dhe Ekonomisë, Delina Ibrahimaj gjatë diskutimit të borxhit në Komisionin e Ekonomisë dhe Financave. Ibrahimaj theksoi se likuiditeti në llogarinë unike të thesarit (TSA) është rreth 70 miliardë lekë, i bollshëm, sipas saj, për të vijuar normalisht me ekzekutimin e buxhetit për këtë vit dhe për vitin tjetër. Nga ana tjetër deputetja e Partisë Demokratike, Jorida Tabaku bëri të ditur se qeveria nuk përmbushi angazhimin e saj, për të ulur borxhin publik, ndërsa detyrimet e prapambetura i ka çuar në 1 miliard euro.http://ata.gov.al/2022/11/03/borxhi-publik-zbret-ne-67-5-te-pbb-se-ne-vitin-2023/