Certifikohet me sukses nga NATO, grupbatalioni i Këmbësorisë së Lehtë i Forcave Tokësore. Lajmin e bëri të ditur ministri i Mbrojtjes Niko Peleshi, i cili përmes një postimi në rrjetet sociale përcolli edhe imazhe nga stërvitja ku u krye edhe certifikimi. “Grupi i vlerësimit dhe monitorimit të Aleancës, gjatë stërvitjes “Biza ‘22” vlerësoi me sukses paraqitjen e Forcave tona të Armatosura”, u shpreh ministri Peleshi. Sipas tij, me këtë arritje grupbatalioni i Këmbësorisë së Lehtë konfirmohet si strukturë operacionale e gatshme për t’u përdorur nga NATO, në çdo kohë, denjësisht në krah të aleatëve. Mbi 1 mijë trupa dhe mbi 200 mjete ishin pjesë e stërvitjes më të madhe të Forcave të Armatosura, të koduar “Biza-22”, në të cilën u aplikuan manualet më të mira në përdorim nga NATO. “Certifikimi i grupbatalionit të Këmbësorisë së Lehtë nga Aleanca është dëshmia më e mirë e përpjekjeve të bëra deri tani nga të gjitha nivelet e komandimit dhe të drejtimit të FA”, u shpreh Peleshi në nisje të stërvitjes.
