Biden: Do t’u kundërpërgjigjemi kërcënimeve kineze

SHBA do të veprojë për të mbrojtur veten nëse Kina kërcënon sovranitetin e saj, tha presidenti amerikan Joe Biden në fjalimin e tij para kombit. Por, Biden shtoi se ishte i përkushtuar të bashkëpunonte me Kinën për interesat e SHBA dhe të botës. “Por, mos bëni gabim në lidhje me këtë. Siç e bëmë të qartë javën e kaluar, nëse Kina kërcënon sovranitetin tonë, ne do të veprojmë për të mbrojtur vendin tonë”, theksoi ai. SHBA rrëzuan të dielën një balonë të dyshuar spiune kineze, e cila kishte fluturuar mbi vend prej ditësh. Biden tha se ia kishte bërë të qartë presidentit të Kinës Xi Jinping se SHBA kërkon konkurrencë, jo konflikt. “Nuk do të kërkoj falje që po investojmë për ta bërë Amerikën të fortë. Bota po përballet me sfida serioze”, tha Biden. “Gjatë dy viteve të fundit, demokracitë janë bërë më të forta dhe autokracitë më të dobëta”, theksoi ai. “Aleatët po rriten, po shpenzojnë më shumë dhe po bëjnë më shumë. Po krijohen ura midis partnerëve në Paqësor dhe atyre në Atlantik. Dhe ata që vënë baste kundër Amerikës po mësojnë se sa gabim e kanë. Nuk është kurrë një bast i mirë kur vë bast kundër Amerikës”, shtoi ai. atsh